Fréttir

Við bjóðum foreldrum og forráðamönnum barna sem hefja nám í 1. bekk í haust hjartanlega velkomna á kynningarfund um skólastarfið fimmtudaginn 4. júní kl.14:30 í fjölnotasal skólans. Við hlökkum til að hitta ykkur öll.

Mikil gleði ríkti í Stapaskóla á dögunum þegar foreldrafélagið færði nemendum veglegar sumargjafir. Fulltrúar félagsins komu færandi hendi með fjölbreyttan leiktækjabúnað sem mun nýtast vel í frímínútum og útivist. Gjöfin innihélt fótbolta, körfubolta, snúsnúbönd, húllahringi og krítar fyrir yngri nemendur. Unglingarnir fengu sömuleiðis nýja borðtennisspaða og kúlur til að efla afþreyingu innanhúss. Grétar Már Garðarsson, formaður foreldrafélagsins, afhenti gjafirnar formlega. Birna Ósk Óskarsdóttir, aðstoðarskólastjóri, tók við þeim fyrir hönd skólans ásamt þeim Kjartani Ara og Birni Orra úr 2. bekk. Þessi höfðinglega gjöf hvetur nemendur til aukinnar hreyfingar og samveru. Við þökkum foreldrafélaginu innilega fyrir frábæran stuðning og hlýju í garð skólans.

Frístundaheimili grunnskólanna (Sumarfrístund), fyrir tilvonandi 1. bekkinga (börn fædd 2020), verða opin frá 11. ágúst til skólasetningar. Markmiðin með þessari opnun eru m.a. að brúa bilið milli leik- og grunnskólagöngu nemenda, að aðlögun nýrra leikskólabarna geti hafist sem fyrst að hausti og að aðlaga tilvonandi 1. bekkinga í grunnskólann sinn. Skráning er hafin og fer fram í gegnum www.mittreykjanes.is eða http://www.sumar.vala.is og er skráning fyrir þetta tímabil ótengd skráningu fyrir frístundaheimilin eftir að skólastarf hefst. Gert er ráð fyrir því að foreldrar séu búnir að skrá börnin sín fyrir 29. maí. Opnunartíminn verður frá 9:00 – 15:00. Börnin fá hádegismat og síðdegisnesti. *17. ágúst verða frístundaheimilin opin frá 11:00 – 15:00 þar sem starfsmannafundur og fræðsla fyrir starfsfólk er í upphafi dags. ATH! Foreldrar með systkini á leikskólum eða hjá dagforeldrum eru beðnir um að setja inn upplýsingar um systkin vegna fjölskylduafsláttar í reitinn annað. Gjaldskrá: Gjaldskrá fyrir tímabilið 11. – 24. ágúst 2026 Frístund í 10 daga frá kl. 9:00 – 15:00 - 24.801 kr. *Opið frá 10:00-15:00 15. ágúst þar af hádegismatur og síðdegisnesti - 8.186 kr. Fjölskylduafsláttur (eingöngu af tímagjaldi – 16.615 kr.) gildir milli skólastiga, þ.e. dagforeldra, leikskóla og frístundaheimila.

Nemendur í 2. bekk hafa verið í skriftar- og ritunarátaki síðastliðnar vikur. Átakinu lauk með sögukeppni innan árgangsins þar sem hver nemandi skrifaði og samdi sína eigin sögu. Frábært tækifæri fyrir nemendur að nýta þá tækni sem þau höfðu tileinkað sér síðastliðnar vikur. Nemendur fengu kynningu á verkefninu og varð strax mikill spenningur fyrir því. Kennarar kynntu þau verðlaun sem í boði voru, svo sem verðlaun fyrir bestu söguna, mestu framfarirnar og fyrir vandaða skrift. Í dag voru úrslit tilkynnt og var Ævar vísindamaður sérstakur gestadómari. Hann tók að sér það vandasama hlutverk að velja úr frábærum sögum nemenda. Til að gera stundina enn eftirminnilegri sendi hann nemendum myndbandskveðju þar sem hann tilkynnti sigurvegarana. Nemendur fylgdust spenntir með tilkynningunni og fögnuðu velgengni bekkjarfélaga sinna. Við erum afar stolt af öllum þátttakendum og þeirri frábæru vinnu sem þau lögðu í verkefnið. Innilega til hamingju allir nemendur í 2. bekk!

Leiklistarval Stapaskóla veturinn 2025 - 2026 setti upp dýrin í Hálsaskógi á vordögum. Þetta er annað árið sem leiklistarval Stapaskóla setur upp söngleik og býður skólasamfélaginu að koma og horfa á sýningar hjá þeim. Í vetur valdi hópurinn að setja upp Dýrin í Hálsaskógi. Nemendur í leikhópnum hafa unnið hörðum við æfingar og nemendur í leikmyndavalinu hafa hannað og búið til sviðsmyndina. Leikritið var frumsýnt föstudaginn 24. apríl og sýndu nemendur í heildina 4 sýningar sem voru vel sóttar. Allir nemendur sem koma að sýningunni eiga hrós skilið fyrir frábæra frammistöðu, leikarar, leikmyndafólk og sviðsmenn sem mættu aukalega á æfingar og sýningar til að stýra miðasölu, sjoppu og halda utan um alla leikmuni á meðan á sýningu stóð og fá þær Rebekka, Dagný og Hrafntinna sérstakar þakkir frá leikhópnum. Til þess að geta sett upp svona sýningu þarf mikla hjálp frá samfélaginu innan og utan skólans. Þetta árið vorum við svo heppin að fá auglýsingastyrki frá fyrirtækjum ásamt þess að margir gáfu af tíma sínum og/eða hjálpuðu til við að finna búninga og leikmuni fyrir okkur.