Fréttir

Skólaslit og útskrift 10. bekkjar fóru fram þriðjudaginn 10. júní við hátíðlega athöfn í íþróttasal skólans. Athöfnin var bæði formleg og persónuleg, og nemendur tóku virkan þátt í skipulagningu hennar og framvindu. Vorið og upphaf sumars eru uppskerutími í grunnskólum landsins. Þá líta nemendur og starfsfólk yfir farinn veg og meta hvernig til tókst á skólaárinu. Á skólaslitum fá nemendur vitnisburð sinn og staðfestingu á vinnu sinni síðustu mánuði. Einnig eru lesin upp hrósskjöl hvers og eins, þar sem bekkjarfélagar og starfsfólk sem kemur að hópnum setja fram styrkleika nemenda í fallegum og heildstæðum texta. Í ávarpi skólastjóra var farið yfir helstu áherslur Stapaskóla og það öfluga skólastarf sem þar fer fram. Í Stapaskóla læra nemendur ekki einungis margföldun, málfræði og myndlist, heldur einnig um lífið sjálft – vináttu, virðingu og fjölbreytileika. Þeir læra að þekkja sjálfa sig, standa með öðrum og takast á við ný verkefni með opnum huga. Þessar lexíur eru dýrmæt veganesti inn í framtíðina. Starfsmenn skólans vinna markvisst eftir einkunnarorðum skólans, í gegnum gildi sem miða að því að auka vellíðan nemenda. Mannauður skólans er öflugur og faglegur og leggur sig fram við að skapa aðstæður sem stuðla að aukinni gleði í námi, vellíðan og sterkri sjálfsmynd nemenda. Á þessu skólaári höfum við öll gengið í gegnum ýmislegt saman – upplifað skemmtilega viðburði, tekið þátt í spennandi verkefnum og leyst áskoranir. Við höfum líka lært að takast á við erfiðleika og lagt okkar af mörkum til að skapa betra samfélag innan skólans. Í ár kveðja nokkrir starfsmenn skólann og halda á vit nýrra ævintýra. Við þökkum þeim innilega fyrir samfylgdina og óskum þeim velfarnaðar á nýjum vettvangi. Þeir fengu afhenta rós í þakklætisskyni: Guðný Ósk Garðarsdóttir Jórunn Björk Magnúsdóttir Katrín Georgsdóttir Kormákur Andri Þórsson Sindri Þór Guðmundsson Ottó Helgason Útskrift 10. bekkjar Á útskriftarathöfn 10. bekkjar flutti Gróa Axelsdóttir skólastjóri ávarp. Nemendurnir Amelía, Gísli og Ísey fluttu einnig ávarp fyrir hönd bekkjarins. Umsjónarkennararnir Guðrún og Kormákur töluðu til nemenda og afhentu þeim vitnisburð ásamt Stapaskólatrefli til minningar um veru þeirra í Stapaskóla. Að lokinni athöfn var boðið til glæsilegrar veislu í sal skólans fyrir nemendur, aðstandendur og starfsfólk. Viðurkenningar Að venju voru veittar viðurkenningar fyrir framúrskarandi árangur á ýmsum sviðum: Framúrskarandi árangur í bóklegum greinum: Amelía Sara hefur sýnt mikinn metnað og dugnað í námi. Hún setti sér skýr markmið og vann ötullega að þeim. Með skipulagi, einbeitingu og jákvæðu viðhorfi hefur hún náð framúrskarandi árangri í bóklegum greinum og er góð fyrirmynd samnemenda sinna. Gísli Kristján hefur einnig sýnt mikinn metnað og unnið markvisst að markmiðum sínum með stöðugum framförum. Hann hefur einbeittan vilja, sýnir ábyrgð og jákvætt viðhorf til náms og er öðrum til fyrirmyndar. Verðlaun fyrir skapandi og gagnrýna hugsun: Júlía Sól hefur sterkar skoðanir, ríka réttlætiskennd og nýtur þess að rökræða við bæði samnemendur og kennara. Hún er forvitin, óhrædd við að leita svara og tilbúin að skoða fjölbreyttar leiðir í verkefnavinnu. Verðlaun fyrir þrautseigju og dugnað í námi: Diana hefur sýnt mikla þrautseigju og metnað. Hún hóf nám í íslenskum grunnskóla í 9. bekk og hefur með mikilli vinnu náð að halda í við samnemendur. Verðlaun fyrir framúrskarandi félagsstarf: Ísey Rún hefur unnið ötullega að félagslífi skólans síðustu þrjú ár. Hún tekur virkan þátt í öllum viðburðum og leggur sig fram við að efla skólasamfélagið. Verðlaun fyrir árangur í skólaíþróttum: Gísli Kristján hefur náð framúrskarandi árangri í skólaíþróttum og sundi. Hann er kurteis, virðingarsamur og jákvæður leiðtogi í íþróttatímum. Klaudia er vinnusöm og jákvæð, sýnir ávallt kurteisi og virðingu í garð samnemenda og kennara. Hún hefur skarað fram úr í íþróttum og sundi og verið mikilvægur liðsmaður í skólahreystiliði Stapaskóla. Verðlaun fyrir framúrskarandi árangur í náttúruvísindum: Amelía Sara vinnur af nákvæmni og forvitni í náttúruvísindum. Hún spyr góðra spurninga, leitar sjálfstætt lausna og sýnir vönduð vinnubrögð. Verðlaun fyrir góðan árangur í list- og verkgreinum: Hrönn hefur skarað fram úr í myndlist með hæfileikum sínum, djúpri hugsun og persónulegri sköpun. Hún er frumleg, vandvirk og fagleg í allri sinni vinnu. Oliwia er sjálfstæð, skapandi og sýnir frumkvæði og öryggi í úrvinnslu verkefna. Hún vinnur af mikilli fagmennsku. Viðurkenning fyrir fyrirmyndar sjálfsvinnu: Sigurður Ragnar hlýtur hvatningarviðurkenningu fyrir að horfa á hindranir sem verkefni sem hægt er að yfirstíga. Hann er á góðri leið með að ná markmiðum sínum og hvetjum við hann áfram til enn frekari þroska og árangurs.