Sjálfbærnivika í Reykjanes UNESCO jarðvangi tókst vel til

Vikuna 25. september til 1. október var í fyrsta skipti haldin Sjálfbærnivika í Reykjanes UNESCO jarðvangi. Hugmyndin að vikunni kom frá UNESCO skólateyminu sem samanstendur af fulltrúum frá Suðurnesjavettvangi, Reykjanes jarðvangi og GeoCamp Iceland.

Nemendur skólans tóku virkan þátt í fjölbreyttum verkefnum sem sneru að sjálfbærni og umhverfisvernd. Þetta var fyrsta skrefið í því að gera sjálfbærnivikuna að árlegum viðburði sem vekur athygli á mikilvægi sjálfbærni í daglegu lífi.

Eitt af áhrifaríkustu verkefnunum var ruslaplokk þar sem allir árgangar skólans tóku þátt. Fyrsti bekkur hreinsaði skólalóðina, á meðan aðrir árgangar tóku að sér mismunandi götur í nágrenni skólans. Nemendur í 10. bekk gengu alla leið niður að Stapaskóla og hreinsuðu svæðið meðfram Furudal, Lerkidal, Geirdal og Dalsbraut. Verkefnið fór fram á mánudeginum og tókst einstaklega vel.

Annað mikilvægt verkefni var vigtun á matarafgöngum í mötuneyti skólans. UNESCO teymið hélt utan um vigtunina og deildi niðurstöðunum með starfsfólki sem síðan miðlaði upplýsingunum til nemenda. Þetta verkefni var liður í að auka umræðu meðal nemenda um matarsóun og hvernig hægt er að minnka hana.

Í tengslum við Heimsins stærstu kennslustund unnu nemendur á unglingastigi með vistkeðjuna, en yngri árgangar völdu sér eitt heimsmarkmið sem þeir rýndu í gegnum fræðslu og leiki. Þetta gaf nemendum tækifæri til að kafa dýpra í sjálfbærnihugtakið og skilja betur hvernig þeir geta lagt sitt af mörkum.

Kennarar skólans lögðu sitt af mörkum með því að ræða sjálfbærni við nemendur og tengja hana við námsefnið. Markmiðið með Sjálfbærnivikunni var að vekja athygli á ýmsu sem auðvelt er að breyta til þess að auka sjálfbærni í daglegu lífi okkar allra. Miðað við viðbrögð nemenda og starfsfólks, má segja að þetta markmið hafi sannarlega náðst.