Fréttir

Leiklistarval Stapaskóla veturinn 2025 - 2026 setti upp dýrin í Hálsaskógi á vordögum. Þetta er annað árið sem leiklistarval Stapaskóla setur upp söngleik og býður skólasamfélaginu að koma og horfa á sýningar hjá þeim. Í vetur valdi hópurinn að setja upp Dýrin í Hálsaskógi. Nemendur í leikhópnum hafa unnið hörðum við æfingar og nemendur í leikmyndavalinu hafa hannað og búið til sviðsmyndina. Leikritið var frumsýnt föstudaginn 24. apríl og sýndu nemendur í heildina 4 sýningar sem voru vel sóttar. Allir nemendur sem koma að sýningunni eiga hrós skilið fyrir frábæra frammistöðu, leikarar, leikmyndafólk og sviðsmenn sem mættu aukalega á æfingar og sýningar til að stýra miðasölu, sjoppu og halda utan um alla leikmuni á meðan á sýningu stóð og fá þær Rebekka, Dagný og Hrafntinna sérstakar þakkir frá leikhópnum. Til þess að geta sett upp svona sýningu þarf mikla hjálp frá samfélaginu innan og utan skólans. Þetta árið vorum við svo heppin að fá auglýsingastyrki frá fyrirtækjum ásamt þess að margir gáfu af tíma sínum og/eða hjálpuðu til við að finna búninga og leikmuni fyrir okkur.

Undanfarnar vikur hafa nemendur í 9. og 10. bekk unnið með mannslíkamann í stærra þema sem ber heitið Maður á jörð. Þessi yfirferð um starfsemi okkar dásamlegu vélar náði ákveðnum hápunkti í dag þegar nemendur fengu einstakt tækifæri til að kynnast líffærunum með beinum og verklegum hætti. Í stað þess að rýna eingöngu í teikningar í kennslubókum eða horfa á myndbönd á skjá, breyttist skólastofan í spennandi rannsóknarstofu þar sem raunveruleg líffæri voru til skoðunar. Verkefni dagsins fólst í því að kryfja og rannsaka brjóstholslíffæri úr svínum. Þar sem líffæri svína eru um margt mjög lík líffærum manna, var þetta dýrmæt leið til að átta sig á stærð, áferð og flókinni uppbyggingu okkar eigin innvols. Nemendur rannsökuðu barkann, lungun, þindina og hjartað af mikilli nákvæmni, en auk þess fengu þau að kynnast lifrinni og nýrunum þar sem þau fylgdu með brjóstholslíffærunum. Kennslustundin einkenndist af mikilli eftirvæntingu og forvitni. Nemendur unnu saman í hópum og skiptu með sér verkum á skipulagðan hátt. Eitt af því sem vakti hvað mesta lukku og undrun var þegar lungun voru blásin upp. Það var merkileg sjón að sjá hvernig þetta holrúm fylltist af lofti og hversu mikið loft lungun þoldu. Í kjölfarið voru líffærin skorin af varkárni svo hægt væri að kanna innri gerð þeirra. Nemendur skoðuðu hólf hjartans, þykkt hjartavöðvans og hvernig barkinn kvíslast niður í lungun eins og greinar á tré. Það sem stóð þó upp úr að mati kennara var sú frábæra samvinna sem ríkti á milli nemenda allan tímann. Verkefni sem þetta getur verið krefjandi, en börnin sýndu hvert öðru mikinn stuðning og hjálpsemi. Sumir voru til dæmis óragir við að handleika skurðhnífana á meðan aðrir sáu um að skrá niður athuganir eða aðstoða við að halda líffærunum til svo betur væri hægt að skoða það sem var áhugavert. Þessi samvinna var hreinlega til fyrirmyndar og andinn í hópnum var bæði jákvæður og hvetjandi. Áhugi nemendanna var ótvíræður og var þessi dagur ekki bara mikilvægur fyrir skilning þeirra á líffærafræði, heldur styrkti hann líka félagsleg tengsl þeirra í gegnum sameiginlega upplifun sem þau munu eflaust muna eftir lengi. Við erum afar stolt af okkar flottu nemendum og þeim þroska sem þau sýndu í þessu áhugaverða verkefni.

Fræðsla fyrir foreldra/forráðamenn í boði foreldrafélagsins í Stapaskóla þann 22. apríl frá kl. 08:30-09:30. Fræðslan fer fram í fjölnotasal skólans en í henni verður farið yfir sjálfsmyndina og þá ýmsu þætti sem hafa áhrif á okkur frá degi til dags. Einnig er farið yfir hvernig við getum öll lagt okkur fram að eiga heilbrigð og uppbyggileg samskipti, bæði í vinasamböndum og í samskiptum á netinu. Hvetjum alla til að mæta og hlökkum til að sjá sem flesta. Nemendur í 7.-10. bekk fá fræðslu í kjölfar fyrirlesturs foreldra.

Aðalfundur foreldrafélags grunnskólastigs Stapaskóla verður haldinn 15. apríl kl. 20:00 á sal skólans. Á dagskrá er eftirfarandi: 1. Ársreikningur 2025 2. Lög foreldrafélags Stapaskóla 3. Kosning stjórnar fyrir skólaárið 2026/2027 4. Önnur mál Með von um að sjá sem flesta foreldra.

Páskafrí nemenda og starfsfólks Stapaskóla hefst mánudaginn 30. mars. Fríið nær yfir alla páskavikuna og fram yfir annan í páskum. Kennsla hefst að nýju þriðjudaginn 7. apríl samkvæmt stundaskrá.

Nemendur í 4. til 10. bekk í Stapaskóla luku nýverið við stöðu- og framvindupróf Matsferils í lesskilningi og stærðfræði. Prófin fóru fram á síðustu þremur vikum og voru leyst á iPad-tölvur nemenda. Allt ferlið gekk einstaklega vel og stóðu nemendur ásamt öðrum þeim sem að prófunum komu sig með mikilli prýði. Þótt lögboðið væri að leggja prófin fyrir nemendur í 4., 6. og 9. bekk, ákváðu grunnskólar Reykjanesbæjar að láta alla nemendur í 4. til 10. bekk taka þau. Þetta var gert svo hægt væri að nýta niðurstöðurnar til að skipuleggja kennslu enn betur í samræmi við stöðu hvers og eins auk þess sem niðurstöðurnar munu nýtast við mat á árangri kennslunnar.

Árshátíð Stapaskóla fór fram í dag við mikinn fögnuð og eftirvæntingu. Nemendur í öllum bekkjum, frá 1. og upp í 10. bekk, sýndu einstaklega flott og metnaðarfull atriði sem vöktu mikla lukku hjá viðstöddum áhorfendum. Dagskráin hófst á því að nemendur í 5. bekk settu á svið magnað opnunaratriði byggt á sögunni um Bláa hnöttinn. Þar á eftir tók 1. til 4. bekkur við með sameinuðu glæsilegu Grease-atriði þar sem söngur og dans voru í fyrirrúmi og Nemendur í 6. bekk sýndu bráðskemmtilegt leikrit um lífið í sínum bekk. Eldri nemendurnir stóðu sig einnig frábærlega. 7. bekkur var með fjörugt dans- og leiklistaratriði og 8. bekkur sýndi kraftmikið „halftimeshow“ þar sem dansinn réð ríkjum, 9. bekkur gladdi gesti með leikriti um skólalífið. Loks steig 10. bekkur á svið með stórglæsilegt atriði sem var innblásið af Barbie-kvikmyndinni. Við viljum þakka foreldrafélaginu sérstaklega fyrir dýrindis veitingar sem boðið var upp á fyrir gesti og gangandi eftir sýningarnar.

Í dag, föstudaginn 20. mars fögnuðu nemendur Stapaskóla þeirri staðreynd að í dag er alþjóðadagur hamingjunnar. Alla vikuna hafa nemendur á leik- og grunnskólastigi unnið með spurninguna: Hvað þarf til svo allir séu hamingjusamir? Þegar hver aldurshópur fyrir sig hafði fundið sameiginlegt svar var það ritað á stóran striga. Nemendur undirrituðu svo með fingrafari sínu. Á deginum sjálfum hittumst við svo í söngstund. Leikskólastigið átti sína söngstund um morguninn og grunnskólastigið rétt eftir hádegi. Á sama tíma frumsýndum við svo alla sameiginlegu vinnuna okkar á striga og enduðum daginn á því að syngja lagið Elsku Heimur eftir Braga Valdimar Skúlason sem hefur verið valið UNESCO lag Reykjaness. Allir stóðu sig stórvel og það var virkilega gaman að enda daginn á slíkri hamingju sem söngur er.