Betri morgnar og jákvæð áhrif á líðan nemenda

Nýleg könnun meðal nemenda og foreldra á unglingastigi sýnir skýrt að breyting á upphafi skóladags úr kl. 08:30 í kl. 09:00 hefur haft jákvæð áhrif á morgna, líðan og einbeitingu nemenda. Niðurstöðurnar benda til þess að breytingin styðji bæði við vellíðan og námsumhverfi og njóti víðtæks stuðnings meðal þeirra sem eiga hlut að máli.

Í upphafi skólaárs var ákveðið að færa upphaf skóladags á unglingastigi í kl. 09:00 með það að markmiði að styðja við betri hvíld og jafnvægi í daglegu skólastarfi. Til að meta áhrif breytingarinnar var lögð fyrir könnun meðal nemenda og foreldra á samtalsdegi þann 29. janúar.

Alls bárust 83 svör frá nemendum og 64 svör frá foreldrum.

Helstu niðurstöður í stuttu máli

• 94% nemenda meta breytinguna jákvæða

• 85% nemenda telja sig koma betur tilbúna til skóladagsins á morgnana

• 86% nemenda telja einbeitingu í námi hafa batnað

• 83% foreldra meta breytinguna jákvæða

• 84% foreldra styðja áframhaldandi fyrirkomulag

Nemendur mjög jákvæðir gagnvart breytingunni

Niðurstöður könnunarinnar sýna að nemendur eru mjög jákvæðir gagnvart því að skóladagurinn hefjist kl. 09:00. Mikill meirihluti nemenda telur að morgnarnir séu rólegri og að auðveldara sé að mæta í skólann.

Samkvæmt niðurstöðum telja 85% nemenda sig koma betur tilbúna til skóladagsins á morgnana og stór hluti þeirra telur að breytingin hafi haft jákvæð áhrif á einbeitingu og þátttöku í námi.

Foreldrar sjá einnig jákvæð áhrif

Foreldrar staðfesta þessa upplifun að stórum hluta. Meirihluti þeirra telur að breytingin hafi haft jákvæð áhrif á líðan barna sinna fyrir skóladag og að morgnar á heimilum séu rólegri.

Alls meta 83% foreldra breytinguna jákvæða og 78% telja að barn sitt sé betur úthvílt þegar skóladagurinn hefst. Þá styðja 84% foreldra áframhaldandi fyrirkomulag.

Áhrif á líðan og námsumhverfi

Samantekt niðurstaðna bendir til þess að breyting á upphafi skóladags hafi haft jákvæð áhrif á bæði líðan og námsumhverfi nemenda. Aukinn svefn og rólegri morgnar geta haft jákvæð áhrif á einbeitingu, þátttöku í námi og almenna vellíðan í skólastarfi.

Næstu skref

Niðurstöður könnunarinnar hafa verið kynntar nemendum og einnig í skólaráði. Í ljósi jákvæðra niðurstaðna og þess stuðnings sem fram kemur bæði hjá nemendum og foreldrum hefur verið ákveðið að halda áfram á sömu braut og hefja skóladag á unglingastigi kl. 09:00 einnig næsta skólaár.

Með þessum niðurstöðum er ljóst að breytingin hefur reynst vel. Skólinn mun áfram fylgjast með áhrifum hennar og þróa starfið áfram í góðu samstarfi við nemendur, foreldra og starfsfólk, með hagsmuni og vellíðan nemenda að leiðarljósi.