Myndasafn

Börnin á Mánasteini höfðu mikinn áhuga á sögunni um Greppikló svo ákveðið var að grípa áhuga þeirra og vinna meira með söguna. Það eru ótal mörg orð sem við erum að vinna með upp úr bókinni í orðaforðakennslu sem við vinnum með á hverjum degi. Út frá þessu verkefni reynum við að flétta inn allar námsgreinar. Eftir að við lásum söguna teiknuðu börnin mynd upp úr bókinni sem vakti þeirra áhuga.

Þriðjudaginn 30. maí fengu nemendur í 7. bekk heimsókn frá nemendum Samvinnu – miðstöð símenntunar. Nemendur Samvinnu færðu krökkunum peysur að gjöf með slagorðinu Stopp einelti. Stopp einelti er unnið af hópi nemenda hjá Samvinnu og er markmið hópsins að vekja athygli á einelti. Hópurinn leggur áherslu á að forvarnaráætlanir beinist að því að skapa öruggt og styðjandi skólaumhverfi, stuðla að jákvæðum félagslegum samskiptum og kenna börnum og unglingum að þekkja og bregðast við eineltishegðun. Við þökkum kærlega fyrir gjöfina og fyrir að skapa umræðu um þarft málefni.

Skólaslit og útskrift 10. bekkjar fór fram dagana 7. og 8. júní við hátíðlega athöfn á sal skólans og inni í tvenndum nemenda.

Miðvikudagurinn 31. maí var stór dagur hjá elstu börnum leikskólastigs Stapaskóla en þann dag útskrifuðust þau við hátíðlega athöfn í fjölnotasal skólans. Við óskum útskriftarnemendum okkar og aðstandendum þeirra innilega til hamingju með áfangann.

Samgöngustofa heldur úti umferðarskóla fyrir elsta hóp leikskólabarna. Í umferðarskólanum er m.a. fjallað um öryggi barna í bílum, hvernig fara eigi yfir götu, hvar öruggast sé að hjóla og leika sér úti. Leikskólar sjá nú um umferðarskólann sjálfir í samvinnu við Samgöngustofu. Í þessari viku fengu börnin á Óskasteini umferðafræðslu en í henni má sjá innipúkann og krakkana úr Kátugötu bregða fyrir sem nemendur þekkja úr bókunum sem sendar eru heim til allra barna á aldrinum 3-6 ára.

Föstudaginn 19. maí fór fram íþróttadagur Stapaskóla. Þar keppa árgangar sín á milli um stapabikarinn. Keppt er í 12 greinum t.d. púsl, bandý, pokahlaup, boðhlaup, negla nagla og fl.

Sunnudagurinn 30. apríl er Stóri plokkdagurinn. Í tilefni þess fóru nemendur í 2. bekk saman út og skoðuðu skólalóðina með augum náttúrunnar. Á sama tíma safnaði hópurinn öllu rusli sem þau fundu. Þau greindu tegundir ruslins niður eftir flokkunarreglum sem þau leituðu eftir á vefnum og flokkuðu allt samviskusamlega.

Skólaskákmót á vegum Skáksambands Íslands var haldið í Stapaskóla 19. apríl. 180 krakkar úr grunnskólum á Suðurnesjum kepptu í þremur aldursflokkum á þessu glæsilega stórmóti.

Brunavarnir Suðurnesja heimsækir árlega elstu börnin á leikskólum á þjónustusvæðinu til að fræða þau og fjölskyldur þeirra um eldvarnir. Slökkviliðsmenn hafa Loga og Glóð sér til halds og trausts í þessum heimsóknum, en þau eru aðstoðarmenn slökkviliðsins í þessu verkefni. Einnig fá börnin í hendurnar möppur sem í er ýmislegt er tengist brunavörnum auk skemmtilegra verkefna og einfaldra ráðleggingar til foreldra og forráðamanna um öryggi heimilisins.

Öskudagurinn var haldinn hátíðlegur í Stapaskóla. Nemendur og starfsfólk mættu í hinum ýmsu búningum og var fjölbreytni í búningavali mikil.